കാഞ്ഞങ്ങാട്: കാസര്കോട് ഉള്പ്പടെ സംസ്ഥാനത്തെ വിവിധ ജില്ലകളിലും നിരവധി പേര്ക്ക് ജര്മനിയിലെക്ക് വിസ വാഗ്ദാനം ചെയ്ത് ലക്ഷങ്ങളുടെ തട്ടിപ്പ് നടത്തിയ പ്രതിയെ ഹോസ്ദുര്ഗ് പൊലീസ് ബംഗളൂരുവില് നിന്ന് പിടികൂടി. തൃശൂര് ജില്ലയിലെ അഷ്ടമിച്ചിറ സ്വദേശി ഗൗതം കൃഷ്ണ പി.ബി (25)യെ ആണ് പൊലീസ് കസ്റ്റഡിയിലെടുത്തത്. ജര്മനിയിലേക്ക് ജോലി വാഗ്ദാനം ചെയ്ത് വിസ നല്കാമെന്ന് പറഞ്ഞ് കബളിപ്പിച്ച് നിരവധി യുവാക്കളില് നിന്നും ലക്ഷങ്ങള് തട്ടിയെടുത്തെന്ന പരാതിയുടെ അടിസ്ഥാനത്തിലാണ് നടപടി.
സംസ്ഥാനത്തിന്റെ പലഭാഗങ്ങളില് 30ഓളം പേരില് നിന്നുമായി 60 ലക്ഷത്തോളം രൂപ ഇയാള് തട്ടിയെടുക്കുകയും പിന്നീട് പല കാരണങ്ങള് പറഞ്ഞു കബളിപ്പിക്കുകയുമായിരുന്നു. പണം നല്കിയവര്ക്ക് കൃത്യമായ മറുപടി ലഭിക്കാതെയായതിനെ തുടര്ന്നാണ് പൊലീസില് പരാതിയെത്തിയത്. ബംഗളൂരുവില് ആഡംഭര ജീവിതം നയിക്കുകയായിരുന്ന പ്രതിയെ കാഞ്ഞങ്ങാട് ഡിവൈഎസ്പി സികെ സുനില്കുമാറിന്റെ നേതൃത്വത്തില് ഹോസ്ദുര്ഗ് ഇന്സ്പെക്ടര് പി. അജിത്ത് കുമാര്, എഎസ്ഐ ആനന്ദകൃഷ്ണന്, സീനിയര് സിവില് പൊലീസ് ഓഫീസര്മാരായ സനീഷ് കുമാര്, കമല് കുമാര്, ജ്യോതിഷ് എന്നിവര് ചേര്ന്നാണ് പ്രതിയെ വലയിലാക്കിയത്. സൈബര് വിദഗ്ദ്ധരായ സീനിയര് സിവില് പൊലീസ് ഓഫീസര് അനില് കെടി, സിവില് പൊലീസ് ഓഫീസര് രമിത്ത് എന്നിവരും സംഘത്തിലുണ്ടായിരുന്നു.
Post a Comment
0 Comments