കാസര്കോട്: കാസര്കോട് നഗരസഭാ ചെയര്മാന് അബ്ബാസ് ബീഗം വാക്കുപാലിച്ചതോടെ പ്രവര്ത്തനം നിലച്ച തെക്കില് ടാറ്റ ആശുപത്രിയില് ഉപയോഗിക്കാതെ കിടന്ന 400 എംവിഎ ജനറേറ്റര് കാസര്കോട് ജനറല് ആശുപത്രിയില് എത്തിച്ച് സ്ഥാപിച്ചു. ജനറല് ആശുപത്രിയില് പ്രത്യേക ഫൗണ്ടേഷന് ഒരുക്കിയാണ് ജനറേറ്റര് സ്ഥാപിച്ചത്. ജനറേറ്ററിന്റെ പ്രവര്ത്തനോദ്ഘോടനം എന്.എ നെല്ലിക്കുന്ന് എം.എല്.എ നിര്വഹിച്ചു. നഗരസഭാ ചെയര്മാന് അബ്ബാസ് ബീഗം അധ്യക്ഷത വഹിച്ചു.
വൈദ്യുതി മുടങ്ങിയാല് സിടി സ്കാന് ഉള്പ്പെടെ സൗകര്യം ലഭ്യമല്ലാത്ത അവസ്ഥയായിരുന്നു ജനറല് ആശുപത്രിയില്. ഇതു പരിഹരിക്കാന് കൂടുതല് ശേഷിയുള്ള ജനറേറ്റര് 11 കി.മീറ്റര് അപ്പുറത്തുള്ള ടാറ്റാ ആശുപത്രിയില് നിന്ന് കൊണ്ടുവരുന്നതിനു എട്ടു മാസം മുമ്പ്് കലക്ടര് അനുമതി നല്കിയിരുന്നു. എന്നാല് ഇതു കൊണ്ടുവരുന്നതിനുള്ള ചെലവ് 10 ലക്ഷത്തോളം രൂപ അനുവദിക്കാത്തത് തടസമായി. ഇതിനെ തുടര്ന്ന് ആവശ്യമായ തുക നഗരസഭ അനുവദിക്കുമെന്ന് ചെയര്മാന് അബ്ബാസ് ബീഗം വാക്കുനല്കുകയായിരുന്നു. നഗരസഭ ഈ തുക പ്രത്യേക പദ്ധതിയില് ഉള്പ്പെടുത്തി അനുവദിച്ചതോടെ ക്രെയിന് മുഖേന ജനറേറ്റര് ജനറല് ആശുപത്രിയില് എത്തിക്കുകയായിരുന്നു. കൂടാതെ ജനറേറ്റര് സ്ഥാപിക്കുന്നതിനുള്ള ഫൗണ്ടേഷന് ഒരുക്കുന്നതിന് 75,000 രൂപ ആശുപത്രി വികസന സമിതിയുടെ ഫണ്ടില് നിന്നും അനുവദിച്ചു. ഇതു കമ്മിഷന് ചെയ്തതോടെ ജനറേറ്ററിനു വേണ്ടിയുള്ള മാസങ്ങളുടെ കാത്തിരിപ്പിന് വിരാമമായിരിക്കുകയാണ്.
ജനറേറ്റര് പ്രവര്ത്തനോദ്ഘാടന ചടങ്ങില് ആശുപത്രി സൂപ്രണ്ട് ശ്രീകുമാര് മുഗു സ്വാഗതം പറഞ്ഞു. നഗരസഭാ സ്റ്റാന്റിംഗ് കമ്മിറ്റി ചെയര്പേഴ്സണ്മാരായ സഹീര് ആസിഫ്, ഖാലിദ് പച്ചക്കാട്, ആശുപത്രി വികസനസമിതി അംഗം ഭാസ്ക്കരന്, ജവാദ് പുത്തൂര്, നഴ്സിംഗ് സൂപ്രണ്ട് ലത, പി.ആര്.ഒ സല്മ, ബാല സുബ്രഹ്മണ്യം, രാധാകൃഷ്ണന്, ഡോക്ടര്മാര്, ജീവനക്കാര് സംബന്ധിച്ചു.
Post a Comment
0 Comments