(www.evisionnews.co) വിജിലന്സ് ശിപാര്ശയെ തുടര്ന്ന് ടൈറ്റാനിയം അഴിമതിക്കേസ് സംസ്ഥാന സര്ക്കാര് സിബിഐയ്ക്ക് വിട്ടു. സ്ഥാപനത്തില് മലിനീകരണ നിയന്ത്രണ സംവിധാനം ഏര്പ്പെടുത്തിയതുമായി ബന്ധപ്പെട്ട കേസിന്റെ അന്വേഷണമാണ് സിബിഐയ്ക്ക് വിട്ടത്. ഉമ്മന് ചാണ്ടി, രമേശ് ചെന്നിത്തല, ഇബ്രാഹിം കുഞ്ഞ് എന്നിവര്ക്കെതിരെ ഗുരുതര ആരോപണം ഉന്നയിക്കുന്ന കേസ് നിലവില് വിജിലന്സാണ് അന്വേഷിച്ചിരുന്നത്.
2004-06 കാലത്ത് ഉമ്മന്ചാണ്ടി മുഖ്യമന്ത്രിയായിരുന്നപ്പോള് പൊതുമേഖലാ സ്ഥാപനമായ ടൈറ്റാനിയത്തില് മാലിന്യ സംസ്കരണ പ്ലാന്റ് സ്ഥാപിക്കുന്നതിനായി ഉപകരണങ്ങള് വാങ്ങിയതില് അഴിമതിയുണ്ടെന്നാണ് കേസ്. മെറ്റ്കോണ് എന്ന കമ്പനിയുടെ പഠന റിപ്പോര്ട്ടിന്റെ അടിസ്ഥാനത്തിലാണ് മാലിന്യപ്ലാന്റ് നിര്മ്മിക്കാന് തീരുമാനിച്ചത്. ഫിന്ലാന്റ് ആസ്ഥാനമായ കെമറ്റോ എക്കോ പ്ലാനിംഗ് എന്ന സ്ഥാപനത്തില് നിന്നും 260 കോടി രൂപക്ക് മാലിന്യ സംസ്കരണ പ്ലാന്റിനുള്ള ഉപകരണങ്ങള് ഇറക്കുമതി ചെയ്യാന് ധാരണാപത്രം ഒപ്പിട്ടിരുന്നു.
86 കോടിയുടെ ഉപകരണങ്ങള് ഇറക്കുമതി ചെയ്തെങ്കിലും ഒരു ഉപകരണം പോലും ഇതുവരെ സ്ഥാപിക്കാനായില്ല. ഉദ്യോഗസ്ഥരുള്പ്പെടെ ആറുപേരാണ് ഇപ്പോള് പ്രതികള്. 80 കോടി നഷ്ടം സംഭവിച്ചുവെന്ന് വിജിലന്സ് കണ്ടെത്തിയിരുന്നു. വിദേശകമ്പനി ഉള്പ്പെടുന്ന കേസായതിനാല് സിബിഐയ്ക്ക് കൈമാറണമെന്ന് സംസ്ഥാന സര്ക്കാരിനോട് വിജിലന്സ് ശിപാര്ശ ചെയ്യുകയായിരുന്നു.
Post a Comment
0 Comments