ദോശയുണ്ടാക്കാന്‍ വൈകിയതിന് തോക്കുചൂണ്ടി ഭീഷണി: കൊച്ചിയില്‍ യുവാവ് അറസ്റ്റില്‍

കൊച്ചി (www.evisionnews.co): ദോശ കിട്ടാന്‍ വൈകിയപ്പോള്‍ കളിത്തോക്കെടുത്ത് തട്ടുകടക്കാരനെ ഭീക്ഷണിപ്പെടുത്തിയ യുവാവ് അറസ്റ്റില്‍. കൊല്ലം സ്വദേശി സുനിലാണ് (40) അറസ്റ്റിലായിരിക്കുന്നത്. വെള്ളിയാഴ്ച രാത്രി എട്ടരയോടെ വൈറ്റില ഹബ്ബിന് സമീപമാണ് സംഭവം. സിനിമാ സ്‌റ്റൈലിലുള്ള യുവാവിന്റെ പ്രകടനം കണ്ട് ആളുകള്‍ ആദ്യം അമ്പരക്കുകയാണ് ഉണ്ടായത്.

തട്ടുദോശ നല്‍കാന്‍ വൈകിയതോടെ ഇയാള്‍ തോക്കെടുക്കുകയായിരുന്നു. തട്ടുകടക്കാരും, കടയിലുണ്ടായിരുന്നവരും പരിഭ്രാന്തരായി. തോക്ക് ചൂണ്ടി ഭീഷണിപ്പെടുത്തിയാണ് കടക്കാരനെക്കൊണ്ട് ദോശയുണ്ടാക്കിച്ചത്. യഥാര്‍ത്ഥ തോക്കാണെന്ന് കരുതി ആരും അടുത്തില്ല. ദോശ കഴിച്ചശേഷം കൈകഴുകി മടങ്ങാന്‍ ശ്രമിക്കവേ ഭക്ഷണത്തിന്റെ പണം ചോദിച്ച കടക്കാരന്റെ നേര്‍ക്ക് യുവാവ് വീണ്ടും തോക്ക് ചൂണ്ടുകയായിരുന്നു.

പോലീസെത്തി ഇയാളെ കീഴ്‌പ്പെടുത്തി തോക്ക് കൈവശപ്പെടുത്തിയപ്പോഴാണ് കളിത്തോക്കാണെന്ന് മനസിലായത്. വൈദ്യ പരിശോധനയില്‍ ഇയാള്‍ മദ്യപിച്ചിട്ടുണ്ടെന്ന് തെളിഞ്ഞു. പൊതുജനങ്ങളെ ഭീഷണിപ്പെടുത്തിയതിന് പിഴ ഈടാക്കി വിട്ടയച്ചതായി മരട് എസ്എച്ച് സി. വിനോദ് പറഞ്ഞു.