പി.ജെ.ജോസഫിന് കെ.എം.മാണിയുടെ ക്ലീൻ ചീട്ട്;രാപകൽ സമരത്തിൽ പങ്കെടുത്തതിൽ തെറ്റില്ല

കോട്ടയം:(www.evisionnews.co)യുഡിഎഫിന്റെ രാപകൽ സമരത്തിന് പി.ജെ.ജോസഫ് പോയതിൽ തെറ്റില്ലെന്ന് കേരള കോൺഗ്രസ് (എം) ചെയർമാൻ കെ.എം.മാണി. പി.ജെ.ജോസഫ് യുഡിഎഫ് വേദിയിലെത്തിയതിനെ രാഷ്ട്രീയമായി കാണേണ്ടതില്ല. സമരം സ്വന്തം നിയോജക മണ്ഡലത്തിൽ സഹോദര പാർട്ടികൾ നടത്തിയതാണ്. മുന്നണി പ്രവേശനത്തിന്റെ കാര്യത്തിൽ രണ്ടഭിപ്രായമില്ലെന്നും മാണി പറഞ്ഞു. ഇന്ധന നികുതി വേണ്ടെന്നു വയ്ക്കാൻ എൽഡിഎഫ് സർക്കാർ തയാറാകണമെന്നും അദ്ദേഹം ആവശ്യപ്പെട്ടു.

നേരത്തെ വിശദീകരണവുമായി ജോസഫും രംഗത്തെത്തിയിരുന്നു. രാപകല്‍ സമരത്തില്‍ പങ്കെടുത്തതിന് രാഷ്ട്രീയമാനം നല്‍കേണ്ടതില്ല. അതൊരു സന്ദർശനം മാത്രമായിരുന്നു. രാപകൽ സമരത്തിൽ നേരിട്ടു പങ്കാളിയാകാൻ ഉദേശിച്ചിരുന്നില്ല. അടുത്ത് മറ്റൊരു ചടങ്ങിനെത്തിയപ്പോൾ കയറിയതാണെന്നും അദ്ദേഹം പറഞ്ഞിരുന്നു.

തൊടുപുഴ മുനിസിപ്പൽ മൈതാനിയിൽ സംഘടിപ്പിച്ച രാപകൽ സമരത്തിലാണ് ജോസഫ് പങ്കെടുത്തത്. സമരത്തിന് ആശംസ നേരാനെത്തിയ കേരള കോൺഗ്രസ് (എം) വർക്കിങ് ചെയർമാൻ പി.ജെ. ജോസഫ്, സമരപ്പന്തലിലെത്തി പ്രസംഗിച്ച ശേഷമാണു മടങ്ങിയത്. കേരള കോണ്‍ഗ്രസ് (എം) മുന്നണിവിട്ടശേഷം ആദ്യമാണ് ജോസഫ് യുഡിഎഫ് പരിപാടിയില്‍ പങ്കെടുത്തത്.