കാസര്കോട്: (www.evisionnews.in) ജില്ലയിലെ കമ്മ്യൂണിസ്റ്റ് പാര്ട്ടിയുടെ തലമുതിര്ന്ന നേതാവ് അഡ്വ. കെ കെ കോടോത്ത് എന്ന കുഞ്ഞിക്കമ്മാരന് നായര് (84 ) നിര്യാതനായി. കാസര്കോട് ജില്ലയിലെ കമ്മ്യൂണിസ്റ്റ് പാര്ട്ടിയുടെ ജില്ലാ സെക്രട്ടറിയേറ്റംഗം, ജില്ലാ എക്സിക്യൂട്ടീവംഗം, കാസര്കോട് താലൂക്ക് സെക്രട്ടറി എന്നീ നിലകളില് പ്രവര്ത്തിച്ചിരുന്നു. വ്യാഴാഴ്ച ഉച്ചയോടെയായിരുന്നു അന്ത്യം. 1971 മുതല് 84 വരെ കാസര്കോട് താലൂക്ക് കമ്മറ്റി സെക്രട്ടറിയായിരുന്നു. സെക്രട്ടറിയായിരുന്ന യു എല് ഭട്ട് ജൂഡീഷ്യല് സര്വ്വീസില് പ്രവേശിച്ചതിനെ തുടര്ന്നാണ് കെ കെ കോടോത്ത് സെക്രട്ടറിയായത്. പിളര്പ്പിന് ശേഷം കാസര്കോട് താലൂക്കിലെ വിവിധ മേഖലകളില് സി പി ഐ കെട്ടിപടുക്കുന്നതില് മുന്നിന്ന് പ്രവര്ത്തിച്ചു. കിസാന് സഭ ജില്ലാ പ്രസിഡണ്ടായി ദീര്ഘകാലം പ്രവര്ത്തിച്ചു. മലബാര് ദേവസ്വം ബോര്ഡ് രുപീകരിച്ചപ്പോള് അതിലെ ആദ്യ അംഗമായിരുന്നു. താലൂക്ക് ലാന്റ് ബോര്ഡ് അംഗം, അഭിഭക്ത കണ്ണൂര് ജില്ല ആര് ടി എ അംഗം, താലൂക്ക് ലാന്റ് അസൈമെന്റ് കമ്മറ്റിയംഗം തുടങ്ങി വിവിധ മേഖലകളില് പ്രവര്ത്തിച്ചിരുന്നു. സമാധാന സൗഹൃദ സംഘടനകളായ ഐപ്സോ, ഇസ്കഫ് തുടങ്ങിയ സംഘടനകളില് നേതൃത്വപരമായ പ്രവര്ത്തനം നടത്തിയിരുന്നു. വലിയ സൃഹൃദ് ബന്ധത്തിന് ഉടമയായിരുന്ന അദ്ദേഹം സി പിഐ നേതാക്കളായ പി കെ വാസുദേവന് നായര്, ഡോ. എ സുബ്ബറാവു, സി എച്ച് കൃഷ്ണന് മാസ്റ്റര്, എം രാമപ്പമാസ്റ്റര്, കെ കുഞ്ഞിക്കണ്ണന് തുടങ്ങിയവരോടൊപ്പം പ്രവര്ത്തിച്ചിരുന്നു. കാസര്കോട് ബിഡിസി ചെയര്മാനായിരുന്നു. മികച്ച വായനക്കാരനും സാംസ്കാരിക പ്രവര്ത്തകനായിരുന്നു. സെന്റ് അലോഷ്യസ് കോളേജ് മംഗലാപുരം, മദ്രാസ് ലോകോളേജ് എന്നിവിടങ്ങളില് ഉന്നത വിദ്യാഭ്യാസം നടത്തി. കാസര്കോട് ബാറിലെ സിവില് അഭിഭാഷകനായിരുന്നു. ഭാര്യ: അമൃതകല. മക്കള്: ലത, പ്രസാദ്. മരുമക്കള്: അനൂപ്, സിന്ധു. മരണ വിവരം അറിഞ്ഞ് റവന്യൂ മന്ത്രി ഇ ചന്ദ്രശേഖരന്, കൃഷി വകുപ്പ് മന്ത്രി വി എസ് സുനില്കുമാര്, സംസ്ഥാന കൗണ്സിലംഗങ്ങളായ കെ വി കൃഷ്ണന്, ടി കൃഷ്ണന്, ജില്ലാ സെക്രട്ടറി അഡ്വ. ഗോവിന്ദന് പള്ളിക്കാപ്പില്, ബങ്കളം കുഞ്ഞികൃഷ്ണന്, എം അസിനാര്, വി രാജന്, പി എ നായര്, അഡ്വ. വി സുരേഷ് ബാബു, അഡ്വ. രാധാകൃഷ്ണന് പെരുമ്പള തുടങ്ങിയവര് വീട്ടിലെത്തി അന്തിമോപചാരം അര്പ്പിച്ചു.
കെ കെ കോടോത്തിന്റെ നിര്യാണത്തില് സി പി ഐ ജില്ലാ കൗണ്സില് അനുശോചിച്ചു
കാസര്കോട് : ജില്ലയിലെ കര്ഷക-കമ്മ്യൂണിസ്റ്റ് പ്രസ്ഥാനത്തിന്റെ തലമുതിര്ന്ന നേതാവായ കെ കെ കോടോത്തിന്റെ നിര്യാണത്തില് സി പി ഐ ജില്ലാ കൗണ്സില് അഗാതമായ ദുഖം രേഖപ്പെടുത്തി. ദൗര്ഭാഗ്യകരമായ പിളര്പ്പിനെ തുടര്ന്നുണ്ടായ പ്രതിസന്ധിക്കിടയില് പാര്ട്ടി കെട്ടിപടുക്കുന്നതില് സി എച്ച് കൃഷ്ണന്മാസ്റ്റര്, ഡോ. എ സുബ്ബറാവു, എം രാമപ്പമാസ്റ്റര് തുടങ്ങിയ നേതാക്കള്ക്കൊപ്പം മുന്നിന്ന് പ്രവര്ത്തിച്ച നേതാവെന്ന നിലയില് എക്കാലവും പാര്ട്ടി അനുസ്മരിക്കുമെന്നും കുറിപ്പില് അറിയിച്ചു. കിസാന്സഭ കെട്ടിപടുക്കുന്നതില് ത്യാഗപൂര്ണമായ പ്രവര്ത്തനം നടത്തിയ നേതാവാണ് അദ്ദേഹം. കാസര്കോട്ടെ സാമൂഹ്യ സാംസ്കാരിക രംഗത്തെ നേതാവായിരുന്നു കെ കെ കോടോത്തെന്നും ജില്ലാ കൗണ്സില് അനുസ്മരിച്ചു.
Post a Comment
0 Comments