പിണറായി വിജയന്‍ ഡല്‍ഹിയില്‍: വൈകിട്ട് മോദിയെ കാണും

ന്യൂഡല്‍ഹി (www.evisionnews.in): മുഖ്യമന്ത്രി പിണറായി വിജയന്‍ ഡല്‍ഹിയിലെത്തി. രാവിലെ ഡല്‍ഹിയിത്തിയ പിണറായി വൈകിട്ട് 4.30ന് പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തും. രാഷ്ട്രപതിയുമായും ഉപരാഷ്ട്രപതിയുമായും കൂടിക്കാഴ്ചയുണ്ട്. ഡല്‍ഹി കേരള ഹൗസില്‍ വിവിധ മലയാളി സംഘടനകളുടെ നേതൃത്വത്തില്‍ പിണറായിക്ക് സ്വീകരണം നല്‍കി.

29, 30 തിയതികളില്‍ ചേരുന്ന സിപിഎം പൊളിറ്റ് ബ്യൂറോയില്‍ പങ്കെടുക്കാനാണ് പിണറായി വിജയന്‍ ഡല്‍ഹിയിലെത്തുന്നത്. രാവിലെ 10.30ന് ഡല്‍ഹിയിലെത്തിയ മുഖ്യമന്ത്രി 12 മണിക്ക് ഉപരാഷ്ട്രപതിയുമായി കൂടിക്കാഴ്ച നടത്തും. അതിന് ശേഷം ഒരു മണിയോടെ കേന്ദ്രമന്ത്രി അരുണ്‍ ജെയ്റ്റിലിയെ സന്ദര്‍ശിക്കും. 

ആറു മണിക്ക് രാഷ്ട്രപതിയെ സന്ദര്‍ശിക്കും. സന്ദര്‍ശനം സൗഹൃദ ലക്ഷ്യത്തോടെയുള്ളതാണെന്നും നിവേദനങ്ങളൊന്നും നല്‍കില്ലെന്നും പിണറായി വിജയന്‍ നേരത്തെ വ്യക്തമാക്കിയിരുന്നു. വൈകിട്ട് ഏഴ് മണിക്ക് വിവിധ മലയാളി സംഘടനകളുടെ നേതൃത്വത്തില്‍ കേരളഹൌസില്‍ മുഖ്യമന്ത്രിക്ക് സ്വീകരണം ഒരുക്കിയിട്ടുണ്ട്. പിണറായി വിജയനൊപ്പം മറ്റ് മന്ത്രിമാരാരും ഡല്‍ഹിയിലെത്തില്ല. 29, 30 തിയതികളിലാണ് സിപിഎം പൊളിറ്റ് ബ്യൂറോ യോഗം നടക്കുക. വിഎസിന്റെ പദവി സംബന്ധിച്ച് നിര്‍ണായക തീരുമാനമുണ്ടാകുമെന്ന് കരുതുന്ന പിബിയില്‍ കേരള നേതാക്കളുടെ നിലപാട് നിര്‍ണായകമാകും. പൊളിറ്റ് ബ്യൂറോ യോഗത്തിന് ശേഷം തിങ്കളാഴ്ച വൈകിട്ട് പിണറായി വിജയന്‍ കേരളത്തിലേക്ക് മടങ്ങും.