സ്ഥാനാര്ത്ഥിയോ നാമനിര്ദ്ദേശകനോ നേരിട്ട് വരണാധികാരി മുമ്പാകെ പത്രിക നല്കണം. ഒരുസ്ഥാനാര്ത്ഥിയ്ക്ക് പരമാവധി നാല് സെറ്റ് പത്രികവരെ സമര്പ്പിക്കാം. സ്ഥാനാര്ത്ഥിയും നാമനിര്ദ്ദേശകരും യഥാസ്ഥാനത്ത് ഒപ്പുവെയ്ക്കണം. മറ്റൊരു മണ്ഡലത്തിലെ വോട്ടറാണ് സ്ഥാനാര്ത്ഥിയെങ്കില് വോട്ടര് പട്ടികയുടെ ബന്ധപ്പെട്ട താലൂക്ക് തഹസില്ദാര് സാക്ഷ്യപ്പെടുത്തിയ പകര്പ്പ് സമര്പ്പിക്കണം. ഫോം 26 ലും 26 എയിലും സ്ഥാനാര്ത്ഥി നോട്ടറി സാക്ഷ്യപ്പെടുത്തിയ സത്യവാങ്മൂലം സമര്പ്പിക്കണം. ഈ സത്യവാങ്മൂലത്തില് എല്ലാ കോളങ്ങളും പൂരിപ്പിക്കണം. കോളങ്ങളില് അതാത് സ്ഥാനാര്ത്ഥികള്ക്ക് ബാധകമാകുന്ന തരത്തില് വിവരങ്ങള് നല്കുകയും ബാധകമാകാത്തവയില് ബാധകമല്ല എന്നും എഴുതണം. വര, കുത്ത്, ഡിറ്റോ എന്നിവ എഴുതാന് പാടില്ല. അത്തരം കോളങ്ങളില് ഇല്ല,അല്ലെങ്കില് ബാധകമല്ല എന്ന് രേഖപ്പെടുത്തേണ്ടതാണ്. ഈ സത്യവാങ്മൂലത്തില് കോളങ്ങള് പൂരിപ്പിക്കാതിരിക്കുകയോ വരയോ ഡിറ്റോയോ എഴുതിയാലോ നാമനിര്ദ്ദേശ പത്രിക നിരസിക്കാനിടയാകുന്നതാണ് എന്നും ആയതിനാല് നാമനിര്ദ്ദേശ പത്രിക തയ്യാറാക്കുമ്പോള് പ്രത്യേകം ശ്രദ്ധിക്കണമെന്നും ജില്ലാ കളക്ടര് നിര്ദ്ദേശിച്ചു. നാമനിര്ദ്ദേശ പത്രിക സമര്പ്പിച്ചവരുടെ വിവരങ്ങള് ഓരോ ദിവസവും വരണാധികാരി നോട്ടീസ് ബോര്ഡില് നല്കും. അംഗീകൃതരാഷ്ട്രീയ പാര്ട്ടികളുടേയും സംസ്ഥാനപാര്ട്ടികളുടേയും സ്ഥാനാര്ത്ഥികള് ഒഴികെയുള്ളവര്ക്ക് നാമനിര്ദ്ദേശ പത്രിക സമര്പ്പിക്കാന് 10 പേരുടെ പിന്തുണ വേണം.
നാമനിര്ദ്ദേശ പത്രിക സൂക്ഷ്മ പരിശോധനാ ദിവസം കണക്കാക്കി, ഇരുപത്തഞ്ചോ അതില് കൂടുതലോ പ്രായമുളള, കേരളീയരായ ജനപ്രാതിനിധ്യ നിയമമനുസരിച്ചുളള അയോഗ്യതയില്ലാത്തവര്ക്ക് പത്രിക സമര്പ്പിക്കാം. എന്നാല് പിന്താങ്ങുന്നവര് അതാത് നിയമസഭ മണ്ഡലത്തിലെ സമ്മതിദായകരായിരിക്കണം. പത്രികയോടൊപ്പം 10000 രൂപ കെട്ടിവെയ്ക്കുകയും അല്ലെങ്കില് ട്രഷറിയില് ഈ തുക അടച്ചതിന്റെ റസീപ്റ്റ് ഹാജരാക്കുകയോ വേണം. നാമനിര്ദ്ദേശപത്രികാ സമര്പ്പണത്തിനും സൂക്ഷ്മ പരിശോധനയിലും സ്വീകരിക്കേണ്ട നടപടി ക്രമങ്ങളെ കുറിച്ച് ജില്ലാ കളക്ടര് ഇ ദേവദാസന് വരണാധികാരികള്ക്ക് ക്ലാസ്സെടുത്തു. യോഗത്തില് ഇലക്ഷന് ഡെപ്യൂട്ടി കളക്ടര് ആര് പി മഹാദേവ കുമാര്, വരണാധികാരികളായ സബ് കളക്ടര് മൃണ്മയി ജോഷി, ഡെപ്യൂട്ടി കളക്ടര് (എല് എ) ബി അബ്ദുള് നാസര്, പ്ലാനിംഗ് ഓഫീസര് പി ഷാജി, ഡെപ്യൂട്ടി കളക്ടര് (എല് ആര്) സി ജയന്, ഡെപ്യൂട്ടി കളക്ടര്(ആര് ആര്) ഇ ജെ ഗ്രേസി, എ ആര് ഒ മാരായ വി സുരേഷ്കുമാര് (കാഞ്ഞങ്ങാട്), കെ വി നാരായണന് (തൃക്കരിപ്പൂര്) ടി ആര് അഹമ്മദ് കബീര് (ഉദുമ), എ ശ്രീവത്സന് (കാസര്കോട്), പി വി ജസീര് (മഞ്ചേശ്വരം), ഫിനാന്സ് ഓഫീസര് കെ കുഞ്ഞമ്പു നായര്, ജില്ലാ പഞ്ചായത്ത് സെക്രട്ടറി ഇ പി രാജ്മോഹന്, അഡീഷണല് തഹസില്ദാര്മാരായ പി കെ ശോഭ, ജയരാജന് വൈക്കത്ത്, ടി ഡി ഒ കെ കൃഷ്ണ പ്രകാശ്, കെ ബാലകൃഷ്ണന്, എ വി രാജന്, ടി എന് ദേവരാജന്, എ ഷാജി, ഫരീദ് അഹമ്മദ് പളളിയാന് തുടങ്ങിയവര് സംബന്ധിച്ചു.
Post a Comment
0 Comments