കറന്തക്കാട് ലോറികള്‍ കൂട്ടിയിടിച്ച് മലപ്പുറം സ്വദേശി മരിച്ചു: കൂടെയുണ്ടായിരുന്ന മകന് ഗുരുതരം

കാസര്‍കോട് (www.evisionnews.in): കറന്തക്കാട് ലോറികള്‍ കൂട്ടിയിടിച്ച് മലപ്പുറം സ്വദേശി മരിച്ചു. ലോറിയില്‍ കൂടെയുണ്ടായിരുന്ന മകന് ഗുരുതരമായി പരിക്കേറ്റു. ഉപ്പളയിലെ ജ്വല്ലറി ജീവനക്കാരന്‍ മലപ്പുറം ബട്ടംകുളം വെല്ലൂര്‍ ഹൗസിലെ പ്രഭാകരനാ (60)ണ് മരിച്ചത്. പരിക്കേറ്റ മകന്‍ സുജേഷിനെ (34) ജനറല്‍ ആശുപത്രിയില്‍ പ്രവേശിപ്പിച്ചു. 

വെള്ളിയാഴ്ച പുലര്‍ച്ചെ 1.45 ഓടെയായിരുന്നു അപകടം. നാട്ടിലേക്ക് പോകാനായി ഇരുവരും കാസര്‍കോട് റെയില്‍വെ സ്‌റ്റേഷനിലേക്ക് പുറപ്പെട്ടതായിരുന്നു പ്രഭാകരനും മകനും. വണ്ടിയൊന്നും കിട്ടാത്തതിനാല്‍ മംഗളൂവില്‍ നിന്നും കണ്ണൂര്‍ ഭാഗത്തേക്ക് ബിയറുമായി പോവുകയായിരുന്ന ലോറിയില്‍ ഉപ്പളയില്‍ നിന്നും ലിഫ്റ്റ് വാങ്ങി കയറിയതായിരുന്നു. കറന്തക്കാട് എത്തിയപ്പോള്‍ ഇരുവരും ഇറങ്ങാന്‍ ശ്രമിക്കുന്നതിനിടെ പിന്നാലെ വരികയായിരുന്ന മറ്റൊരു ലോറി ഇരുവരും സഞ്ചരിച്ചിരുന്ന ലോറിയിലിടിക്കുകയായിരുന്നു. 

അപകടത്തെ തുടര്‍ന്ന് ഇടിച്ച ലോറിയുടെ മുന്‍ഭാഗം ഭാഗികമായി തകര്‍ന്നു. ലോറി ഡ്രൈവര്‍ന്മാര്‍ പരിക്കേല്‍ക്കാതെ രക്ഷപ്പെട്ടു. അപകടത്തില്‍പെട്ട് ലോറികള്‍ രാവിലെ ഒമ്പത് മണിയോടെ പോലീസും നാട്ടുകാരും ചേര്‍ന്ന് നീക്കം ചെയ്തു.

Keywords: Kasaragod-accident