പ്രായപൂര്‍ത്തിയാവാത്തവര്‍ വണ്ടിയോടിച്ച് വാഹനാപകടങ്ങള്‍ പതിവായിട്ടും റോഡിലെ അപകടക്കളി തുടരുന്നു. മൂന്നോ നാലോ പ്രായമുള്ള കുട്ടിയെ ഉപയോഗിച്ച് സ്റ്റിയറിംഗ് നിയന്ത്രിക്കാന്‍ അനുവദിച്ച് രക്ഷിതാക്കള്‍. ഡ്രൈവര്‍ സീറ്റില്‍ അച്ഛന്റെ മടിയില്‍ ഇരുന്ന് പിഞ്ചുകുഞ്ഞിന്റെ ഡ്രൈവിംഗ്. തിരുവനന്തപുരം കഴക്കൂട്ടത്താണ് സംഭവം. കുട്ടി സ്റ്റിയറിംഗ് പിടിച്ച് നിയന്ത്രിക്കുന്ന ദൃശ്യങ്ങളാണ് പുറത്ത് വന്നിട്ടുള്ളത്. 80-100 കിലോമീറ്റര്‍ വേഗതയിലാണ് ഈ അപകടപ്പാച്ചില്‍.
സമീപത്ത് കൂടി വന്ന കാറിലുള്ളവര്‍ വീഡിയോ എടുക്കുന്നത് ശ്രദ്ധയില്‍ വന്നതോടെ വീണ്ടും വേഗതയില്‍ കാര്‍ മുന്നോട്ട് കുതിക്കുകയാണ്. പതിനേഴുകാരന്‍ ഓടിച്ച വാഹനം ഇടിച്ച് ഒരാള്‍ കൊല്ലപ്പെട്ട് ഒരു ദിവസം പിന്നിടും മുമ്പാണ് സംഭവം. കൊല്ലം ഇളമ്പല്‍ സ്വദേശികളാണ് വീഡിയോ ദൃശ്യം പകര്‍ത്തിയത്. അധിക വാഹനങ്ങള്‍ ഇല്ലാത്ത സമയത്താണ് അപകടക്കളിയെന്നതാണ് വലിയ ദുരന്തം ഒഴിവാക്കിയത്. തിരുവനന്തപുരം കഴക്കൂട്ടം എയര്‍പോര്‍ട്ട് റോഡിലാണ് സംഭവം. കണ്ടില്ലെന്ന് നടിക്കാനാവില്ലെന്ന് ബോധ്യമുള്ളതുകൊണ്ടാണ് വീഡിയോ എടുത്തതെന്നാണ് വീഡിയോ എടുത്തതെന്ന് വ്യക്തി പ്രതികരിക്കുന്നത്. അനന്തപുരി ആശുപത്രിക്ക് മുന്നിലുള്ള ഫ്‌ളൈ ഓവറിലാണ് അപകടക്കളി.
Post a Comment
0 Comments