വൈദ്യുതി പ്രതിസന്ധി രൂക്ഷം; ഇന്നും നിയന്ത്രണത്തിന് സാധ്യത, അണക്കെട്ടുകളിൽ 62% വെള്ളം മാത്രം

സംസ്ഥാനത്ത് വൈദ്യുതി പ്രതിസന്ധി രൂക്ഷമായി തുടരുന്നു. പുറത്ത് നിന്നുള്ള വൈദ്യുതി ലഭ്യത കുറഞ്ഞതോടെ ഇന്നലെ രാത്രിയും നിയന്ത്രണം ശക്തമാക്കി. പ്രതിസന്ധി നേരിടാൻ ജലവൈദ്യുതി ഉൽപാദനം വർധിപ്പിച്ച കെഎസ്ഇബി, വിവിധ സംസ്ഥാനങ്ങളിൽനിന്ന് കൂടുതൽ വൈദ്യുതി എത്തിക്കാനുള്ള ശ്രമവും തുടരുകയാണ്. ഇന്ന് മുംബൈ ന്യൂക്ലിയർ പവർ കോർപ്പറേഷൻ മേധാവിയുമായി കെഎസ്ഇബി ചെയർമാൻ ചർച്ച നടത്തും. പ്രതിസന്ധിക്ക് ഉടൻ അയവുണ്ടാകില്ലെന്നും ചർച്ചകൾ തുടരുകയാണെന്നും വൈദ്യുതി മന്ത്രി സണ്ണി ജോസഫ് പറഞ്ഞു.

വൈദ്യുതി നിയന്ത്രണം ഏർപ്പെടുത്തിയിട്ടും സംസ്ഥാനത്തെ ഉപയോഗം ഇന്നലെ ഉയർന്നു. 95.81 ദശലക്ഷം യൂണിറ്റാണ് ആകെ ഉപയോഗിച്ചത്. ജലവൈദ്യുതി ഉൽപാദനം 24.76 ദശലക്ഷം യൂണിറ്റായി ഉയർത്തി. അതേസമയം, അണക്കെട്ടുകളിലെ ജലനിരപ്പ് കുറയുകയാണ്. സംഭരണശേഷിയുടെ 62 ശതമാനം വെള്ളം മാത്രമാണ് നിലവിലുള്ളത്. കഴിഞ്ഞ വർഷം ഇതേ കാലയളവിൽ ഇത് 78 ശതമാനമായിരുന്നു.