ബാങ്കോക്കിലെ പബ്ബിൽ വൻ തീപിടിത്തം; 27 പേർ വെന്തുമരിച്ചു, 22 പേരുടെ നില ഗുരുതരം

തായ്‌ലൻഡ് തലസ്ഥാനമായ ബാങ്കോക്കിലെ പ്രശസ്തമായ പബ്ബിലുണ്ടായ വൻ തീപിടിത്തത്തിൽ 27 പേർ ദാരുണമായി കൊല്ലപ്പെട്ടു. ഞായറാഴ്ച അർദ്ധരാത്രിയോടെയുണ്ടായ അപകടത്തിൽ 63 പേർക്ക് പരിക്കേറ്റിട്ടുണ്ട്. ഇതിൽ 22 പേരുടെ നില അതീവ ഗുരുതരമായി തുടരുകയാണെന്ന് ബാങ്കോക്ക് ഗവർണർ ചാഡ്ചാർട്ട് സിറ്റിപുന്ത് സ്ഥിരീകരിച്ചു. മലയാളികൾ ഉൾപ്പെടെയുള്ള ഇന്ത്യക്കാർ പതിവായി സന്ദർശിക്കുന്ന ചാതുചക് (Chatuchak) ജില്ലയിലെ നാ ലാഡ്പ്രോ (Na Ladprao) പബ്ബിലാണ് നാടിനെ നടുക്കിയ ഈ ദുരന്തമുണ്ടായത്.

കുറഞ്ഞ ചിലവിൽ അവധിക്കാലം ആഘോഷിക്കാനും നൈറ്റ് ലൈഫ് ആസ്വദിക്കാനും മലയാളികൾ ഉൾപ്പെടെയുള്ള ഇന്ത്യക്കാർ സ്ഥിരമായി തിരഞ്ഞെടുക്കുന്ന വിനോദസഞ്ചാര കേന്ദ്രമാണ് ബാങ്കോക്ക്. എല്ലാ ദിവസവും നിരവധി മലയാളി ടൂറിസ്റ്റുകളാണ് ഇവിടെയെത്താറുള്ളത്. അതുകൊണ്ട് തന്നെ ഈ ദുരന്തവാർത്ത വലിയ ആശങ്കയോടെയാണ് നാട്ടിലും നോക്കിക്കാണുന്നത്. അപകടത്തിൽപ്പെട്ടവരിൽ ഇന്ത്യക്കാർ ആരെങ്കിലും ഉൾപ്പെട്ടിട്ടുണ്ടോ എന്ന കാര്യത്തിൽ അധികൃതർ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല. വിനോദസഞ്ചാരികളായ പലരുടെയും കൈവശം പാസ്‌പോർട്ടോ മറ്റ് തിരിച്ചറിയൽ രേഖകളോ ഇല്ലാതിരുന്നത് മരിച്ചവരെയും പരിക്കേറ്റവരെയും തിരിച്ചറിയുന്നതിനുള്ള നടപടികൾ വൈകിപ്പിക്കുന്നുണ്ട്.