കുമ്പള ടോള്‍ സമരം മൂന്നാം ദിനത്തിലേക്ക്

കുമ്പള: ആരിക്കാടി ദേശീയപാതയില്‍ തുടരുന്ന ടോള്‍ പിരിവിനെതിരെ പ്രതിഷേധം കടുപ്പിച്ച് നാട്ടുകാര്‍. അനധികൃതമായി ആരംഭിച്ച ടോള്‍ പിരിവ് നിര്‍ത്തിവെക്കണമെന്നാവശ്യപ്പെട്ട് ആക്ഷന്‍ കമ്മിറ്റി ചെയര്‍മാന്‍ എ.കെ.എം അഷ്‌റഫ് എം.എല്‍.എ നടത്തുന്ന സത്യഗ്രഹ സമരത്തിന് വലിയ ജനപിന്തുണയാണുണ്ടാകുന്നത്. ടോള്‍ പ്ലാസയ്ക്ക് സമീപം ചൊവ്വാഴ്ച രാവിലെയാണ് അനിശ്ചിതകാല സമരത്തിന് പന്തല്‍ ഉയര്‍ന്നത്. തുടര്‍ന്ന് രണ്ടുദിവസങ്ങളിലായി രാപ്പകലില്ലാതെ വിവിധ സംഘടനകള്‍ സമരത്തിന് പിന്തുണയുമായി സമരപ്പന്തലിലെത്തി.

ആക്ഷന്‍ കമ്മിറ്റി ഭാരവാഹികളും മുഴുവന്‍ സമയവും എം.എല്‍.എക്കൊപ്പം സമരപ്പന്തലില്‍ സജീവമാണ്. രാത്രി വൈകുവോളം പ്രദേശത്തുകാരുടെ നേതൃത്വത്തില്‍ കൊട്ടിപാട്ടുള്‍പ്പെടെ സമരത്തിന് ആവേശം പകര്‍ന്നു. നാട്ടുകാര്‍ക്കുള്ള നെഞ്ചത്തടിയായി ദേശീയപാത അധികൃതര്‍ നടത്തുന്ന ടോള്‍ പിരിവ് എന്തുവില കൊടുത്തും നിര്‍ത്തിവെപ്പിക്കാന്‍ വേണ്ടിയുള്ള വലിയ ജനപിന്തുണയാണ് സമരപ്പന്തലില്‍ പ്രകടമാകുന്നത്. വിവിധ രാഷ്ട്രീയ പാര്‍ട്ടികള്‍, സന്നദ്ധ സംഘടനകള്‍, പളളി കമ്മിറ്റികള്‍, ക്ലബ്ബുകള്‍ എന്നിവയുടെ നേതൃത്വത്തില്‍ പ്രകടനമായെത്തി സമരത്തിന് ഐക്യദാര്‍ഢ്യം പ്രഖ്യാപിക്കുന്നത് ഇന്നും തുടരുകയാണ്.