വിദ്യാനഗര്: പ്രായപൂര്ത്തിയാകാത്ത സഹോദരന് സ്കൂട്ടര് ഓടിച്ചെന്ന പേരില് യുവതിയുടെ പേരില് കേസെടുത്ത സംഭവത്തില് എസ്.ഐയെ സ്ഥലംമാറ്റി. വിദ്യാനഗര് എസ്.ഐ എസ്. അനുരൂപിനെയാണ് ക്രമസമാധാന ചുമതലയില് നിന്ന് കാസര്കോട് സൈബര് സെല്ലിലേക്ക് മാറ്റിയത്. സ്പെഷ്യല് ബ്രാഞ്ച് ഡി.വൈ.എസ്.പിയുടെ നേതൃത്വത്തില് നടത്തിയ അന്വേഷണത്തിന്റെ അടിസ്ഥാനത്തിലാണ് ജില്ലാ പൊലീസ് മേധാവി വൈ.ബി വിജയ ഭരത് റെഡ്ഡി നടപടി സ്വീകരിച്ചത്.
കൊല്ലം സ്വദേശിയായ അനുരൂപ് ഒരുമാസം മുമ്പാണ് ഫറോക്കില് നിന്ന് വിദ്യാനഗര് സ്റ്റേഷനിലെത്തിയത്. ഈമാസം ഏഴിന് ചെര്ക്കള ടൗണില് വച്ചാണ് വിവാദ സംഭവമുണ്ടായത്. മേനങ്കോട്ടെ 19കാരി മാജിദക്കെതിരെയാണ് വിദ്യാനഗര് പൊലീസ് കേസെടുത്തത്. പ്രായപൂര്ത്തിയാകാത്ത സഹോദരന് സ്കൂട്ടര് ഓടിച്ചെന്ന് ആരോപിച്ചായിരുന്നു പൊലീസ് നടപടി. എന്നാല് സി.സി.ടി.വി ദൃശ്യങ്ങളില് സഹോദരന് സ്കൂട്ടര് ഓടിച്ചിട്ടില്ലെന്നും മാജിദയാണ് ഓടിച്ചതെന്നും വ്യക്തമായിരുന്നു. ഇതു സംബന്ധിച്ച് മാജിദ ജില്ലാ പൊലീസ് മേധാവിക്ക് സി.സി.ടി.വി ദൃശ്യം സഹിതം പരാതി നല്കുകയായിരുന്നു. പൊലീസിന്റെ നടപടി ഏറെ പ്രതിഷേധങ്ങള്ക്ക് ഇടയാക്കിയിരുന്നു.
Post a Comment
0 Comments