സിദ്ദിഖ് കാപ്പനെതിരെ യുപി പോലീസ് ഒരുകേസ് കൂടി ചുമത്തി

ദേശീയം (www.evisionnews.co): ഉത്തര്‍പ്രദേശിലെ ഹത്രാസില്‍ ദളിത് പെണ്‍കുട്ടിയെ ബലാത്സംഗം ചെയ്ത് കൊലപ്പെടുത്തിയത് റിപ്പോര്‍ട്ട് ചെയ്യാന്‍ പോവുന്നതിനിടെ അറസ്റ്റിലായ മാധ്യമപ്രവര്‍ത്തകന്‍ സിദ്ദിഖ് കാപ്പനെതിരെ പൊലീസ് ഒരു കേസ് കൂടി രജിസ്റ്റര്‍ ചെയ്തു. ഒക്ടോബര്‍ അഞ്ചിനാണ് സിദ്ദിഖ് കാപ്പന്‍ ഹത്രാസിലേക്ക് റിപ്പോര്‍ട്ടിം?ഗിനായി പോയത്. എന്നാല്‍ നാലാം തിയ്യതി രജിസ്റ്റര്‍ ചെയ്ത കേസിലാണ് സിദ്ദിഖിനെ യുപി പോലീസ് പ്രതിചേര്‍ത്തത്.

ഹത്രാസില്‍ കലാപത്തിന് ശ്രമിച്ചെന്ന കേസിലാണ് സിദ്ദിഖ് കാപ്പനെ പ്രതിയാക്കിയത്. നേരത്തെ യു.എ.പി.എ, രാജദ്രോഹം എന്നീ വകുപ്പുകള്‍ ചുമത്തി മഥുരയില്‍ സിദ്ദിഖ് കാപ്പനെതിരെ കേസ് രജിസ്റ്റര്‍ ചെയ്തിരുന്നു. പുതിയ കേസിലും രാജ്യദ്രോഹം ചുമത്തിയിട്ടുണ്ട്. അതേസമയം സിദ്ദീഖ് കാപ്പന്റെ മോചനമാവശ്യപ്പെട്ട് കുടുംബാഗങ്ങള്‍ സമരം തുടങ്ങി. മലപ്പുറം കളക്ടറേറ്റിന് മുന്നിലാണ് കുടുംബാഗങ്ങള്‍ ഉള്‍പ്പെട്ടവര്‍ സമരം നടത്തുന്നത്.