കേരളം (www.evisionnews.co): കൊറോണ മുന്കരുതല് നടപടിയുടെ ഭാഗമായി കരിപ്പൂര് രാജ്യാന്തര വിമാനത്താവളത്തല് സന്ദര്ശകര്ക്ക് കര്ശന നിയന്ത്രണമേര്പ്പെടുത്തി. യാത്രക്കാര്ക്കും ഡ്രൈവര്മാര്ക്കും മാത്രമാണ് വിമാനത്താവളത്തിനകത്തേക്ക് പ്രവേശന അനുമതി.
ആളുകളെ സ്വീകരിക്കാനും യാത്രയയയ്ക്കാനും കൂടുതള് ആളുകള് എത്തുന്നത് നിയന്ത്രിക്കാനാണ് നടപടിയെന്ന് മലപ്പുറം കലക്ടര് ജാഫര് മാലിക് പറഞ്ഞു. സന്ദര്ശക ഗ്യാലറിയില് വിമാനത്താവള അതോറിട്ടിയും സിഐഎസ്എഫും നിയന്ത്രണം ഏര്പ്പെടുത്തും.
വിമാനത്താവളത്തിലേക്കുള്ള റോഡുകളില് മൂന്നിടങ്ങളിലായി പൊലീസ് സംഘവും നിരീക്ഷിച്ച് ആവശ്യമായ നിര്ദ്ദേശങ്ങള് നല്കും. രോഗബാധിത രാജ്യങ്ങളില്നിന്നുള്പ്പെടെ എത്തുന്ന യാത്രക്കാര് പരസ്പരം അകലം പാലിച്ച് സുരക്ഷ ഉറപ്പു വരുത്തണം. വൈറസ് ബാധിത പ്രദേശങ്ങളില്നിന്നെത്തുന്ന രോഗലക്ഷണങ്ങളില്ലാത്തവര് യാത്രക്ക് പൊതുവാഹനങ്ങള് ഉപയോഗിക്കരുത്.
മലപ്പുറത്തുനടന്ന കൊറോണ പ്രതിരോധ മുഖ്യസമിതി യോഗത്തില് ജില്ലാ പൊലീസ് മേധാവി യു. അബ്ദുള് കരീം, അസിസ്റ്റന്റ് കളക്ടര് രാജീവ്കുമാര് ചൗധരി, എ.ഡി.എം. എന്.എം. മെഹ്റലി, ദുരന്ത നിവാരണ വിഭാഗം ഡെപ്യൂട്ടി കളക്ടര് പി.എന്. പുരുഷോത്തമന്, ജില്ലാ മെഡിക്കല് ഓഫീസര് ഡോ. കെ. സക്കീന, ഡെപ്യൂട്ടി ഡി.എം.ഒ. ഡോ. കെ. മുഹമ്മദ് ഇസ്മയില്, എന്.എച്ച്.എം. പ്രോഗ്രാം മാനേജര് ഡോ. എ. ഷിബുലാല്, ജില്ലാ അസിസ്റ്റന്റ് ഇന്ഫര്മേഷന് ഓഫീസര് ഐ.ആര്. പ്രസാദ് എന്നിവര് പങ്കെടുത്തു.
Post a Comment
0 Comments