കാസര്‍കോട്ടെ ബീവറേജ് ഔട്ട് ലെറ്റിലേക്ക് അയച്ച മദ്യം അന്വേഷണത്തിനൊടുവില്‍ കണ്ണൂരില്‍ കണ്ടെത്തി

കാസര്‍കോട് (www.evisionnews.co): പാലക്കാട്ട് നിന്ന് കാസര്‍കോട്ടെ ബിവറേജ് മദ്യശാലയിലേക്ക് അയച്ച 36 കെയ്സ് മദ്യം കാണാതായി. അന്വേഷണത്തിനൊടുവില്‍ കണ്ണുരിലെ ബിവറേജ് മദ്യശാലയില്‍ നിന്ന് ഇവ കണ്ടെടുത്തു. പാലക്കാട് ഡിസ്റ്റിലറിയില്‍ നിന്ന് മൂന്നു പെര്‍മിറ്റിലായി 1800 കെയ്സ് മദ്യമാണ് കയറ്റി അയച്ചത്. ഇതില്‍ 1200 കെയ്സ് കണ്ണൂരിലും 600 കെയ്സ് കാസര്‍കോട്ടെ ബട്ടത്തൂരിലും ഇറക്കിയിരുന്നു. 

ബട്ടത്തൂരില്‍ ഇറക്കിയ മദ്യത്തിന്റെ കണക്കെടുത്ത് നോക്കിയപ്പോള്‍ 36 കെയ്സ് കുറഞ്ഞതായി കണ്ടെത്തി. ഇത് അബദ്ധത്തില്‍ കണ്ണൂരില്‍ ഇറക്കിയതാണോ എന്നറിയാന്‍ അവിടെ ബന്ധപ്പെട്ടെങ്കിലും പെര്‍മിറ്റ് പ്രകാരം ഇറക്കേണ്ട മദ്യം മാത്രമേ ഇറക്കിയിട്ടുള്ളൂവെന്ന് മറുപടി ലഭിച്ചു. ലോഡ് കയറ്റുന്നത് യന്ത്രവല്‍കൃത രീതിയിലാണെന്നും പിഴവ് വരാന്‍ സാധ്യതയില്ലെന്നും പാലക്കാട്ടെ അധികൃതരും വിശദീകരിച്ചു. പിന്നീട് ഡിസ്റ്റിലറി അധികൃതര്‍ നേരിട്ടെത്തി നടത്തിയ പരിശോധനയിലാണ് കണ്ണൂരിലെ സംഭരണശാലയില്‍ 36 കെയ്സ് മദ്യം കൂടുതലായി കണ്ടെത്തിയത്.