ഉപ്പള (www.evisionnews.co): ക്രിമിനല് സംഘങ്ങള് തമ്മില് കുടിപ്പക നിലനില്ക്കുന്ന ഉപ്പളയില് ഗുണ്ടാസംഘങ്ങള് പിടിമുറക്കുന്നു. തുടരെ തുടരെ ഉണ്ടാകുന്ന സംഘര്ഷങ്ങള് നാട്ടുകാരെ ഭീതിയിലാഴ്ത്തി. കഴിഞ്ഞ ദിവസം ഗുണ്ടാസംഘങ്ങള് തമ്മിലുണ്ടായ സംഘര്ഷവുമായി ബന്ധപ്പെട്ട് ഒരാളെ മഞ്ചേശ്വരം പൊലീസ് അറസ്റ്റുചെയ്തു. ഉപ്പള ഹിദായത്ത് നഗറിലെ ബദ്റുദ്ദീന് (31) ആണ് അറസ്റ്റിലായത്. ബദ്റുദ്ദീന്റെ കൂട്ടാളികളായ രണ്ട് പേരെ കുറിച്ച് പൊലീസ് അന്വേഷിച്ചുവരികയാണ്.
ഒരു സംഘത്തെ അക്രമിക്കാനായി ആയുധങ്ങളുമായെത്തിയ സംഘത്തെ എതിര് സംഘം തടഞ്ഞ് കാര് തല്ലിത്തകര്ത്തു. കാറിനകത്ത് മൂര്ച്ഛയേറിയ കത്തിയും വടിവാളും കണ്ടെത്തി. കാര് കസ്റ്റഡിയില് എടുത്തിട്ടുണ്ട്. ബദ്റുദ്ദീന്റെ കാര് തകര്ത്തതിന് മണിമുണ്ടയിലെ സുഹൈല്, റഹീസ് എന്നിവരടക്കം നാലു പേര്ക്കെതിരെ പൊലീസ് കേസെടുത്തു. ഇന്നലെ രാത്രി എട്ടു മണിയോടെ ഉപ്പള റെയില്വെ സ്റ്റേഷന് റോഡില് വെച്ചാണ് സംഭവം. ഇന്നലെ ഉച്ചയ്ക്ക് രണ്ടു ഗുണ്ടാ സംഘങ്ങള് തമ്മില് പത്വാടി റോഡില് വാക്കു തര്ക്കവും കയ്യേറ്റ ശ്രമവും ഉണ്ടായിരുന്നു. ഇതിന്റെ തുടര്ച്ചയായാണ് രാത്രി സംഘര്ഷമുണ്ടായത്.
ആയുധങ്ങളുമായി ഒരു സംഘം കാറില് മണിമുണ്ടയിലേക്ക് പോകുമ്പോള് സംഭവം മണത്തറിഞ്ഞ മണിമുണ്ടയിലെ ഗുണ്ടാ സംഘം റെയില്വെ സ്റ്റേഷന് റോഡില് വെച്ച് കാര് തടയുകയായിരുന്നു. ആളുകള് നോക്കി നില്ക്കെ വടിവാള് കൊണ്ടും മറ്റും കാറിന്റെ ഗ്ലാസുകള് തല്ലിത്തകര്ക്കുകയായിരുന്നു. സംഘര്ഷം കണ്ട പലരും ചിതറിയോടി. സംഘര്ഷത്തെ തുടര്ന്ന് പ്രതികളുടേത് എന്ന് സംശയിക്കുന്ന അഞ്ച് വീടുകളില് മഞ്ചേശ്വരം എസ്.ഐ. അനൂപ് കുമാറിന്റെ നേതൃത്വത്തില് പരിശോധന നടത്തി. ഗുണ്ടാസംഘങ്ങളെ അടിച്ചമര്ത്താന് പൊലീസിന്റെ ഭാഗത്ത് നിന്നും കര്ശനമായ നടപടിയില്ലാത്തതാണ് വീണ്ടും ഇത്തരം സംഘങ്ങള് പ്രശ്നങ്ങള് സൃഷ്ടിക്കുന്നതെന്നാണ് ആരോപണം. ഉന്നത പൊലീസ് ഉദ്യോഗസ്ഥന് നേതൃത്വം നല്കുന്ന പ്രത്യേക സ്ക്വാഡ് രൂപീകരിച്ച് ക്രിമിനല് സംഘങ്ങളെ അടിച്ചമര്ത്തണമെന്ന ആവശ്യവും ശക്തമായിരിക്കുകയാണ്.
Post a Comment
0 Comments