പി.വി അൻവർ എം.എൽ.എയുടെ ബന്ധുവിന്റെ തടയണ;രേഖകളുടെ പരിശോധന നാളെ

മലപ്പുറം:(www.evisionnews.co) പി.വി അൻവർ എം.എൽ.എയുടെ ബന്ധുവി​ന്റെ ഉടമസ്​ഥതയിൽ അരീക്കോട്​ ഉൗർങ്ങാട്ടിരി പഞ്ചായത്തിലെ ചീങ്കണ്ണിപ്പാലിയിലുള്ള തടയണയുടെ രേഖകൾ നാളെ പരിശോധിക്കും. തടയണ നിയമവിരുദ്ധമായാണോ നിർമിച്ചതെന്ന്​ പരിശോധിക്കുന്നതി​ന്റെ ഭാഗമായി പെരിന്തൽമണ്ണ സബ്​ കലക്​ടറുടെ നേതൃത്വത്തിൽ പരാതിക്കാരുടെയും സ്​ഥലമുടമയുടെയും സാന്നിധ്യത്തിലാണ്​ രേഖകളുടെ പരിശോധന നടക്കുക. ഇതിന്​ ഹാജരാവാൻ ബന്ധപ്പെട്ടവർക്ക്​ നോട്ടീസ്​ നൽകിയിട്ടുണ്ട്​.തടയണ നിയമവിരുദ്ധമാണെന്ന്​ തെളിഞ്ഞാൽ ഇത്​ പൊളിച്ചുമാറ്റുന്നതിനുള്ള ചെലവ്​ എത്രയെന്ന്​ കണക്കാക്കി ചെറുകിട ജലസേചന വകുപ്പ്​ സമർപ്പിച്ച റിപ്പോർട്ടും പരിശോധിക്കും. ​തടയണ നിർമിച്ചത്​ നിയമവിരുദ്ധമാണോ എന്ന്​ പരിശോധിക്കുന്നതിന്​ നേരത്തേ മലപ്പുറം കലക്​ടറായിരുന്ന ഭാസ്​കരൻ നിർദേശം നൽകിയിരുന്നു. എന്നാൽ ഇത്​ പൊതുമരാമത്ത്​ കെട്ടിട വകുപ്പിൽ അനക്കമില്ലാതെ കിടന്നു. മൂന്നു തവണ ഇതു സംബന്ധിച്ച്​ കലക്​ടറേറ്റിൽ നിന്ന്​ നോട്ടീസ്​ പോയെങ്കിലും നടപടികളുണ്ടായില്ല. വീണ്ടും പരാതിയുയർന്ന സാഹചര്യത്തിൽ വിശദമായ പരിശോധന നടത്താൻ കലകട്​ർ നിർദേശം നൽകിയതിനെ തുടർന്നാണ്​ രേഖകളുടെ പരിശോധന നടക്കുന്നത്​.