ബദിയടുക്ക (www.evisionnews.in): ബൈക്കില്‍ സഞ്ചരിച്ച യുവാവിനേയും സഹോദരിയേയും തടഞ്ഞുനിര്‍ത്തി ആക്രമിച്ച കേസിലെ പ്രതികളെ പോലീസ് അറസ്റ്റുചെയ്തു. മൂക്കന്‍പാറയിലെ രൂപേഷ് (23), ബദിയടുക്ക ചെന്നാര്‍ക്കട്ടയിലെ മിഥുന്‍ (24) എന്നിവരെയാണ് ബദിയടുക്ക പോലീസ് വ്യാഴാഴ്ച രാവിലെ അറസ്റ്റുചെയ്തത്. പ്രതികളെ കാസര്‍കോട് ചീഫ് ജുഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കി.
ചൊവ്വാഴ്ച രാത്രി 8.30 മണിയോടെ ബാറടുക്കയില്‍വെച്ചാണ് അര്‍ത്തിപ്പള്ളയിലെ മഞ്ചുനാഥിനേയും സഹോദരിയേയും സദാചാര ഗുണ്ടാസംഘം ആക്രമിച്ചത്. ബഹളംകേട്ട് പരിസരവാസികള്‍ എത്തിയപ്പോഴേക്കും അക്രമികള്‍ ഓടിരക്ഷപ്പെട്ടിരുന്നു.
ഇതിനിടെ സംഭവത്തില്‍ പ്രതിഷേധവുമായി സി പി എം പ്രവര്‍ത്തകര്‍ രംഗത്തുവരികയും പ്രതികളെ ഉടന്‍ പിടികൂടണമെന്ന് ആവശ്യപ്പെട്ട് ബദിയടുക്ക പോലീസ് സ്റ്റേഷന്‍ ഉപരോധിക്കുകയും ചെയ്തിരുന്നു. പ്രതികളെ ഉടന്‍ അറസ്റ്റുചെയ്യാമെന്ന് വിദ്യാനഗര്‍ സി ഐ ബാബു പെരിങ്ങോത്ത് ചര്‍ച്ചയില്‍ പങ്കെടുത്ത സി പി എം നേതാക്കള്‍ക്ക് ഉറപ്പുനല്‍കിയതോടെയാണ് പ്രവര്‍ത്തകര്‍ പിരിഞ്ഞുപോയത്.
അക്രമത്തിന് ശേഷം ഒളിവില്‍പോയ പ്രതികളെ പിന്നീട് പോലീസ് കസ്റ്റഡിയിലെടുക്കുകയായിരുന്നു.
keywords:kasaragod-badiyadukka-moral-goondaism-to-arrest
Post a Comment
0 Comments