ഈമാസം 19ന് പുലര്‍ച്ചെയാണ് ഫൈസല്‍ കൊല്ലപ്പെട്ടത്. ഓട്ടോറിക്ഷയില്‍ താനൂര്‍ റെയില്‍വേ സ്റ്റേഷനിലേക്ക് ഭാര്യയുടെ അച്ഛനമ്മമാരെ കൂട്ടിക്കൊണ്ടുവരാന്‍ ഓട്ടോയില്‍ പോകുന്നതിനിടെ ഫാറൂഖ് നഗര്‍ അങ്ങാടിയില്‍വച്ചായിരുന്നു കൊലപാതകം. ഗള്‍ഫിലായിരുന്ന അനില്‍കുമാര്‍ ഇസ്ലാം മതം സ്വീകരിച്ച് ജൂലൈയിലാണ് നാട്ടിലെത്തിയത്. തുടര്‍ന്ന് ഭാര്യയേയും മൂന്ന് മക്കളെയും മതംമാറ്റി. ഇതോടെയാണ് ഫൈസലിന്റെ സഹോദരീ ഭര്‍ത്താവ് വിനോദ് ആര്‍എസ്എസിനെ സമീപിച്ചത്. ഇയാള്‍ സജീവ ബിജെപി പ്രവര്‍ത്തകനാണ്. ആര്‍എസ്എസിന്റെ പ്രാദേശിക നേതാക്കളായ ദിനേശ്, ഹരിദാസന്‍, സുനില്‍, സജീഷ് എന്നിവരെയാണ് സമീപിച്ചത്. പിന്നീട് പരപ്പനങ്ങാടിയിലെ ആര്‍എസ്എസ് നേതൃത്വവുമായും വിഷയം ചര്‍ച്ചചെയ്തു.
ഒക്ടോബറില്‍ ദിനേശന്‍, സജീഷ്, സുനി, വിനോദ്, പ്രദീപ്, ഹരിദാസന്‍ എന്നിവര്‍ പരപ്പനങ്ങാടിയിലെ ആര്‍എസ്എസ് നേതാവ് കോട്ടയില്‍ ജയപ്രകാശിന്റെ നേതൃത്വത്തില്‍ നന്നമ്പ്ര മേലെപ്പുറത്ത് യോഗം ചേര്‍ന്നാണ് ഫൈസലിനെ വധിക്കാനുള്ള പദ്ധതി തയ്യാറാക്കുന്നത്. വിവരം തിരൂരിലെ ആര്‍എസ്എസ് നേതാവിനെ അറിയിക്കുകയും ഇദ്ദേഹത്തിന്റെ നിര്‍ദേശപ്രകാരം മൂന്ന് പ്രതികള്‍ 19ന് പുലര്‍ച്ചെ ഫൈസലിനെ വെട്ടിക്കൊല്ലുകയും ചെയ്യുകയായിരുന്നുവെന്ന് പോലീസ് പറഞ്ഞു.
ഫൈസല്‍ ബന്ധുക്കളെ കൂട്ടാന്‍ താനൂര്‍ റെയില്‍വേ സ്റ്റേഷനിലേക്ക് പോകുന്നത് ലിജീഷാണ് കൃത്യം നിര്‍വഹിക്കാന്‍ നിശ്ചയിക്കപ്പെട്ടവരെ അറിയിച്ചത്. ഇയാളുടെ ഡ്രൈവിങ് സ്‌കൂളില്‍ ജോലിക്കാരിയായ വിനോദിന്റെ ഭാര്യയില്‍നിന്നാണ് ലിജീഷ് യാത്രയുടെ വിവരം ചോര്‍ത്തിയത്. സംഭവം നടന്നതിന്റെ അടുത്ത ദിവസം ഫൈസല്‍ ഗള്‍ഫിലേക്ക് തിരിച്ചുപോകാനിരിക്കുകയായിരുന്നു.
Post a Comment
0 Comments