അമ്മയെ വീടിനുള്ളിലടച്ച് തീവച്ച സംഭവം; തലയില്‍ ചൂടുവെള്ളം ഒഴിച്ചത് രണ്ട് ദിവസം മുന്‍പ്; ലഹരി പിടിച്ചാല്‍ എന്തും ചെയ്യും ചെമ്പന്‍ വിനു

തിരുവനന്തപുരം (www.evisionnews.in): വെഞ്ഞാറമൂട്ടില്‍ മദ്യലഹരിയില്‍ മകന്‍ അമ്മയെ വീടിനുള്ളിലടച്ച് വീടിന് തീയിട്ടു. ഇന്ന് രാവിലെ 10ന് ആയിരുന്നു സംഭവം നടന്നത്. വെഞ്ഞാറമൂട് മാണിക്കല്‍ പഞ്ചായത്തില്‍ പ്ലാക്കീഴ് കുന്നുമുകളില്‍ ചെമ്പന്‍ വിനു എന്ന ബിനു ആണ് മദ്യലഹരിയില്‍ അമ്മയെ അപായപ്പെടുത്താന്‍ ശ്രമിച്ചത്. വീടിന് തീപടര്‍ന്നതോടെ ബിനുവിന്റെ മാതാവ് പ്രാണരക്ഷാര്‍ത്ഥം ഓടി രക്ഷപ്പെടുകയായിരുന്നു.

വീടിന് തീപടര്‍ന്നതോടെ നാട്ടുകാര്‍ ഓടിക്കൂടി തീ കെടുത്തി. എന്നാല്‍ സംഭവത്തെ തുടര്‍ന്ന് വീട്ടുപകരണങ്ങളും മറ്റ് സാധന സാമഗ്രികളും കത്തി നശിച്ചു. മദ്യപിച്ച് പതിവായി പ്രശ്‌നങ്ങളുണ്ടാക്കുന്നതാണ് ബിനുവിന്റെ രീതി. രണ്ട് ദിവസം മുന്‍പ് ബിനു അമ്മയുടെ തലയില്‍ ചൂടുവെള്ളം ഒഴിച്ചതായും പരിസരവാസികള്‍ പറയുന്നു.

പൊലീസെത്തി ഇയാളെ പേരൂര്‍ക്കടയിലെ ലഹരി വിമുക്ത കേന്ദ്രത്തിലേക്ക് മാറ്റിയിട്ടുണ്ട്. പരിസരവാസികള്‍ക്കും ഇയാള്‍ നിരന്തര ശല്യമാണെന്ന് നാട്ടുകാര്‍ പറയുന്നു. സമീപത്തെ വീടുകളിലെ ബള്‍ബുകളും ജനല്‍ചില്ലുകളും അടിച്ച് തകര്‍ക്കുന്നത് ഉള്‍പ്പെടെ പതിവായി ഇയാള്‍ അയല്‍വാസികള്‍ക്കും ശല്യമാണെന്ന് നാട്ടുകാര്‍ പറയുന്നു.