രാജസ്ഥാനില്‍ ഭൂമി തര്‍ക്കത്തെ തുടര്‍ന്ന് ക്ഷേത്ര പുരോഹിതനെ തീകൊളുത്തി കൊന്നു

ദേശീയം (www.evisionnews.co): രാജസ്ഥാനിലെ കരൗലി ജില്ലയില്‍ ഭൂമിയുമായി ബന്ധപ്പെട്ട തര്‍ക്കത്തിനിടെ ഒരു ക്ഷേത്ര പുരോഹിതനെ അക്രമികള്‍ ജീവനോടെ തീകൊളുത്തി കൊന്നു. മുഖ്യ പ്രതിയായ കൈലാഷ് മീനയെ പോലീസ് അറസ്റ്റ് ചെയ്തു. പുരോഹിതനെ ആക്രമിച്ച് ജീവനോടെ ചുട്ടുകൊന്ന മറ്റ് പ്രതികളെ പിടികൂടാനുള്ള ശ്രമം തുടരുകയാണ്.

രാജസ്ഥാനിലെ കരൗലി ജില്ലയിലെ സപോത്രയിലെ ബുക്‌ന ഗ്രാമത്തില്‍ ബുധനാഴ്ചയാണ് സംഭവം നടന്നത്. പൊള്ളലേറ്റതിനെ തുടര്‍ന്ന് പുരോഹിതന്‍ വ്യാഴാഴ്ച രാത്രിയാണ് മരിച്ചത്. 'കേസിലെ മുഖ്യ പ്രതി കൈലാഷ് മീനയെ അറസ്റ്റ് ചെയ്തിട്ടുണ്ട്. ഇക്കാര്യത്തില്‍ അന്വേഷണം നടത്താന്‍ ആറ് ടീമുകളെ നിയോഗിച്ചിട്ടുണ്ട്. മറ്റ് പ്രതികളെ പിടികൂടാനുള്ള ശ്രമം തുടരുകയാണ്' കരൗലി എസ്.പി മൃദുല്‍ കച്വ പറഞ്ഞതായി ഇന്ത്യ ടുഡേ റിപ്പോര്‍ട്ട് ചെയ്തു. അതേസമയം കൈലാഷ് മീനയുടെ മുഴുവന്‍ കുടുംബവും കേസില്‍ ഉള്‍പ്പെട്ടിട്ടുണ്ടെന്ന് പുരോഹിതന്റെ ബന്ധു ആരോപിച്ചു.