മോദീ പ്രഭാവം മങ്ങുന്നു, ആശങ്കയോടെ ബി.ജെ.പി: ജനാധിപത്യം ജയിച്ചെന്ന് രാഹുല്‍

ദേശീയം (www.evisionnews.co): പൊതുതെരഞ്ഞെടുപ്പിന്റെ അരങ്ങിലേക്ക് അടുത്തവര്‍ഷം കടക്കാനിരിക്കെ ബി.ജെ.പിക്ക് പുതിയ പോര്‍മുനകള്‍ രാകി മിനുക്കേണ്ടി വരുമെന്നാണ് ലോക്‌സഭാ തെരഞ്ഞെടുപ്പിന് മുമ്പേ കടന്നുവന്ന അഞ്ചു നിയമസഭാ തെരഞ്ഞെടുപ്പ് ഫലങ്ങള്‍ നല്‍കുന്ന സൂചനകള്‍. പ്രതീക്ഷിച്ചത്ര വിജയമില്ലാത്തതിന്റെ ആശങ്കയിലാണു ബിജെപി. എക്കാലത്തെയും വലിയ ജനകീയ നേതാവെന്ന് പാര്‍ട്ടി ഉറപ്പിച്ചു പറയുന്ന മോദിയുടെ തോളിലേറി മാത്രം പടുകൂറ്റന്‍ ജയമെന്ന ആത്മവിശ്വാസം ചേര്‍ന്നുപോകുന്നു. സര്‍ക്കാരിന്റെ നേട്ടങ്ങളായി കൊട്ടിഘോഷിക്കുന്ന നോട്ടു നിരോധനം, ജിഎസ്ടി തുടങ്ങിയ വിഷയങ്ങള്‍ തിരിച്ചടിയായെന്നു മോദിയും സര്‍ക്കാരും തിരിച്ചറിയുകയാണ്. പാര്‍ട്ടിയുടെ നെടുന്തൂണാണ് മോദിയെന്ന ചിന്തയിലുണ്ടായ ഇടിവാണ് അഞ്ചിടത്തും ആഞ്ഞടിക്കാതിരുന്ന മോദീ തരംഗം.