ന്യൂഡല്ഹി (www.evisionnews.co): പുതിയ വാഹനങ്ങള്ക്ക് അതി സുരക്ഷാ സംവിധാനങ്ങളുള്ള നമ്പര് പ്ലേറ്റുകള് നിര്ബന്ധമാക്കാനൊരുങ്ങി കേന്ദ്രസര്ക്കാര്. ഇതു സംബന്ധിച്ച് കേന്ദ്ര മോട്ടോര്വാഹന ചട്ടത്തില് ഭേദഗതി വരുത്തി വിജ്ഞാപനമിറക്കി. ഏപ്രില് മാസം മുതല് പുതിയ ഭേതഗതികള് നിലവില് വരും. കേന്ദ്ര മോട്ടോര് വാഹന ചട്ടം 2018 ഭേദഗതി വരുത്തിയാണ് പുതിയ ഉത്തരവിറക്കിയത്. രജിസ്റ്റര് ചെയ്യുമ്പോള് മോട്ടോര്വാഹന വകുപ്പ് നമ്പര് നല്കും. ഇത് നമ്പര് പ്ലേറ്റില് പതിച്ച് ഘടിപ്പിക്കേണ്ട ഉത്തരവാദിത്തം ഡീലര്മാര്ക്കായിരിക്കും.
അലുമിനിയം പ്ലേറ്റില് ക്രോമിയം ഉപയോഗിച്ച് ഹോളോഗ്രാഫ് രീതിയില് അക്കങ്ങള് എഴുതിയാണ് അതിസുരക്ഷാ നമ്പര് പ്ലേറ്റുകള് തയാറാക്കുന്നത്. നമ്പര് പ്ലേറ്റ് അഴിച്ചുമാറ്റാനോ മാറ്റങ്ങള് വരുത്താനോ ശ്രമിച്ചാല് ഉപയോഗ ശൂന്യമാകുന്ന രീതിയിലാണ് ഇതിന്റെ നിര്മാണം. ഓരോ വാഹനത്തിനും വ്യത്യസ്ത കോഡുകള് ലേസര്വിദ്യ ഉപയോഗിച്ച് നമ്പര് പ്ലേറ്റില് ഘടിപ്പിക്കും. വാഹനത്തിന്റെ എന്ജിന് നമ്പറടക്കം എല്ലാ വിവരങ്ങളും കോഡുമായി ബന്ധിപ്പിക്കും.
രജിസ്ട്രേഷന് നമ്പര്, എന്ജിന്, ഷാസി നമ്പറുകള് രേഖപ്പെടുത്തിയ സ്റ്റിക്കര് വാഹനത്തിന്റെ മുന്വശത്തെ ഗ്ലാസില് പതിപ്പിക്കും. ഇതില് മാറ്റം വരുത്താന് പിന്നീട് സാധിക്കില്ല. ഇളക്കാന് ശ്രമിച്ചാല് തകരാര് സംഭവിക്കുന്ന വിധത്തിലാണ് രൂപപ്പെടുത്തിയിരിക്കുന്നത്. ഏതെങ്കിലും കാരണവശാല് ഗ്ലാസ് മാറേണ്ടി വന്നാല് പുതിയ സ്റ്റിക്കറിന് അംഗീകൃതര് സര്വീസ് സെന്ററിനെ സമീപിക്കുകയും വേണം. സാധാരണയായ നമ്പര് പ്ലേറ്റുകള് സ്ക്രൂ ഉപയോഗിച്ചാണ് ഘടിപ്പിക്കാറ്. പുതിയ പ്ലേറ്റുകള് റിവെറ്റ് തറച്ചായിരിക്കും പിടിപ്പിക്കുക. ഇത് ഒരു തവണ മാത്രം ഉപയോഗിക്കാന് കഴിയുന്നതായിരിക്കും. പഴയ വാഹനങ്ങള്ക്ക് അതിസുരക്ഷ നമ്പര് പ്ലേറ്റുകള് നിര്ബന്ധമല്ല. താല്പര്യമുള്ളവര്ക്ക് ഘടിപ്പിക്കാവുന്നതാണ്.
Post a Comment
0 Comments