രാഷ്ട്രീയഭാവിക്ക് തടസമാകുമെന്ന് ഭയം; രണ്ടുവയസുകാരിയെ പിതാവ് കഴുത്ത് ഞെരിച്ച് കൊലപ്പെടുത്തി

ബംഗളൂരു (www.evisionnews.co): രാഷ്ട്രീയഭാവിക്ക് തടസമാകുമെന്ന് ഭയന്ന് പിതാവ് രണ്ടു വയസുകാരിയെ ക്രൂരമായി കൊലപ്പെടുത്തി. കര്‍ണ്ണാടകയിലെ ചിത്രദുര്‍ഗ്ഗ ജില്ലയിലാണ് സംഭവം. കുട്ടിയെ കാണാതായെന്ന് പറഞ്ഞ് അമ്മ നല്‍കിയ പരാതിയില്‍ പോലീസ് അന്വേഷിച്ച് വരികെയാണ് കൊല്ലപ്പെട്ട വിവരം പുറത്തറിയുന്നത്. പിതാവായ നിംഗപ്പയാണ് കുട്ടിയെ ക്രൂരമായി കൊലപ്പെടുത്തിയതെന്നും പോലീസ് പറഞ്ഞു.

കുട്ടിയുടെ അമ്മയായ ശശികലയെ നാല് വര്‍ഷം മുമ്പാണ് നിംഗപ്പ പരിചയപ്പെടുന്നത്. ഇവരുടെ വിവാഹം വീട്ടുകാര്‍ എതിര്‍ത്തിരുന്നു. തുടര്‍ന്ന് ഇരുവരും രഹസ്യമായി വിവാഹം കഴിയ്ക്കുകയായിരുന്നു. കുട്ടി ജനിച്ച വിവരം അറിഞ്ഞതോടെ ബന്ധം പരസ്യമാക്കാന്‍ ശശികലയുടെ വീട്ടുകാര്‍ നിംഗപ്പയെ നിര്‍ബന്ധിച്ചിരുന്നു. എന്നാല്‍ വിവാഹിതനായ വിവരം പുറത്തറിയിക്കേണ്ടെന്ന നിലപാടിലായിരുന്നു നിംഗപ്പ.