കേരളം (www.evisionnews.co): ടൗട്ടെ ചുഴലിക്കാറ്റിനെ തുടര്ന്ന് കാസര്കോട് ഉള്പ്പെടെ സംസ്ഥാനത്തെ ഒമ്പത് ജില്ലകളില് കാലാവസ്ഥാ വകുപ്പ് റെഡ് അലര്ട്ട് പ്രഖ്യാപിച്ചു. കാസര്കോടിനെ കൂടാതെ തൃശൂര്, ഇടുക്കി, എറണാകുളം, പാലക്കാട്, മലപ്പുറം, കോഴിക്കോട്, വയനാട്, കണ്ണൂര് എന്നിവിടങ്ങളിലും റെഡ് അലര്ട്ട് പ്രഖ്യാപിച്ചിട്ടുണ്ട്. നേരത്തെ വടക്കന് ജില്ലകളില് മാത്രമായിരുന്നു റെഡ് അലര്ട്ട് പ്രഖ്യാപിച്ചിരുന്നത്.
ടൗട്ടെ ചുഴലിക്കാറ്റിന്റെ പശ്ചാത്തലത്തില് കേന്ദ്ര ജല കമ്മീഷന് തമിഴ്നാട്, കേരള സംസ്ഥാനങ്ങള്ക്കായി ഓറഞ്ച് ബുള്ളറ്റിന് പുറത്തിറക്കി. ഇരുസംസ്ഥാനങ്ങളിലും ചിലയിടങ്ങളില് വെള്ളപ്പൊക്കത്തിന് സാധ്യതയുള്ളതിനാലാണ് മുന്നറിയിപ്പ്. കേരളത്തിലെ മണിമല, അച്ചന്കോവില് എന്നീ നദികളിലും തമിഴ്നാട്ടിലെ കോഡയാര് നദിയിലും ജലനിരപ്പ് ക്രമാതീതമായി ഉയരും.
ചുഴലിക്കാറ്റിനെത്തുടര്ന്ന് കേരളത്തില് വന്തോതില് മഴ പെയ്തിരുന്നു. ഈ സാഹചര്യത്തിലാണ് കേരളത്തിലെ നദികളിലെ ജലനിരപ്പ് കേന്ദ്ര ജല കമ്മീഷന് വിലയിരുത്തിയത്. ചുഴലിക്കാറ്റിനെത്തുടര്ന്ന് കേരളത്തില് അതിതീവ്ര മഴയും അതിശക്തമായ കാറ്റും തുടരുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു. ന്യൂനമര്ദം വെള്ളിയാഴ്ച രാത്രി കണ്ണൂര് തീരത്തുനിന്ന് 300 കിലോ മീറ്റര് മാത്രം അകലെയായിരുന്നു. അതിനാല് വടക്കന് കേരളത്തിലാണ് മഴയും കാറ്റും കൂടുതല് ലഭിച്ചത്. മഴയും കാറ്റും ഞായറാഴ്ചയും തുടരും.
Post a Comment
0 Comments