വിദേശം (www.evisionnews.co): ബ്രിട്ടനില് കണ്ടെത്തിയ കോവിഡ് വൈറസിന്റെ പുതിയ വകഭേദം അതിവേഗം പടരുന്ന സാഹചര്യത്തില് ഇന്ത്യ ഉള്പ്പടെ വിവിധ രാജ്യങ്ങള് മുന്കരുതല് നടപടികള് സ്വീകരിച്ചു തുടങ്ങി. അടിയന്തര സാഹചര്യം കണക്കിലെടുത്ത് അന്താരാഷ്ട്ര ഗതാഗതം സൗദി അറേബ്യ വീണ്ടും നിര്ത്തിവച്ചു. കര, നാവിക, വ്യോമ അതിര്ത്തികള് ഒരാഴ്ചത്തേക്ക് അടച്ചിടുമെന്ന് ആഭ്യന്തര മന്ത്രാലയം അറിയിച്ചു.
രാജ്യത്തെ ജനങ്ങളുടെ ആരോഗ്യ സുരക്ഷ പരിഗണിച്ചാണ് അന്താരാഷ്ട്ര ഗതാഗതം നിര്ത്തിവയ്ക്കാന് തീരുമാനിച്ചതെന്ന് ആഭ്യന്തര മന്ത്രാലയത്തെ ഉദ്ധരിച്ച് സൗദി പ്രസ് ഏജന്സി റിപ്പോര്ട്ടു ചെയ്തു. ആരോഗ്യ പ്രവര്ത്തകര്ക്ക് അടിയന്തിര ഘട്ടങ്ങളില് യാത്രക്കു അനുമതി നല്കും. നിലവില് സൗദിയിലുള്ള വിദേശ വിമാനങ്ങള്ക്ക് മടങ്ങാനും അവസരമുണ്ട്. കോവിഡ് സ്ഥിതിഗതികള് വിലയിരുത്തി ആരോഗ്യമന്ത്രാലയത്തിന്റെ നിര്ദേശങ്ങള് കണക്കിലെടുത്ത് ആവശ്യമെങ്കില് യാത്രാനിരോധനം തുടരുമെന്നും സൗദി ആഭ്യന്തര മന്ത്രാലയ വൃത്തങ്ങള് അറിയിച്ചു.
കര, നാവിക, വ്യോമ അതിര്ത്തികള് ഒരാഴ്ചത്തേക്കാണ് അടയ്ക്കുക. ഡിസംബര് എട്ടിന് ശേഷം യൂറോപ്യന് രാജ്യങ്ങളില് നിന്ന് സൗദിയിലെത്തിയവര് 14 ദിവസം ക്വാറന്റീനിന് കഴിയണം. ഇവര് ഓരോ അഞ്ചുദിവസവും കോവിഡ് പരിശോധന നടത്തണം. കഴിഞ്ഞ മൂന്നു മാസത്തിനിടെ യൂറോപ്പ് സന്ദര്ശിച്ചവരും കൊവിഡ് പരിശോധന നടത്തണം. ഇപ്പോള് സ്വീകരിച്ച നടപടികള് ഒരാഴ്ച കഴിഞ്ഞ് പുനഃപരിശോധിക്കും. ആരോഗ്യ മന്ത്രാലയത്തിന്റെ ശുപാര്ശ അനുസരിച്ച് ആവശ്യമെങ്കില് ഗതാഗത നിയന്ത്രണം തുടരുമെന്നും മന്ത്രാലയം അറിയിച്ചു.
Post a Comment
0 Comments